მოსკოვმა NATO-ს ოფიციალური დიპლომატიური გზავნილით მკაცრად გააფრთხილა, რომ თუ ალიანსის ქვეყნები კალინინგრადის ოლქის რუსეთის დანარჩენი ტერიტორიისგან იზოლირებას შეეცდებიან, რუსეთი მზად იქნება გამოიყენოს მის ხელთ არსებული „ძალებისა და შესაძლებლობების მთელი არსენალი, მათ შორის ბირთვული იარაღი“.

 

რუსეთის დოკუმენტში ასევე საუბარია NATO-ს წევრი ქვეყნების გადაწყვეტილების მიმღებ ცენტრებზე შესაძლო დარტყმებზე კონფლიქტის დაწყებისთანავე. მოსკოვი დასავლეთს „სახიფათო და უპასუხისმგებლო კურსში“ ადანაშაულებს და აცხადებს, რომ ასეთი სცენარი პირდაპირი შეიარაღებული დაპირისპირების მაღალ რისკს ქმნის.

 

კალინინგრადი რუსეთის ექსკლავია, რომელიც პოლონეთსა და ლიტვას შორის, ბალტიის ზღვის სანაპიროზე მდებარეობს. მისი გეოგრაფიული მდგომარეობა მას რუსეთისთვის მნიშვნელოვან სამხედრო-სტრატეგიულ პლატფორმად აქცევს. რეგიონში განთავსებულია საჰაერო თავდაცვისა და სარაკეტო შესაძლებლობები, მათ შორის ბირთვული ქობინების მატარებელი Iskander-ის ტიპის სისტემები.

 

კალინინგრადში მდებარეობს რუსეთის ბალტიის ფლოტის მთავარი საზღვაო ბაზა ბალტიისკში, რაც რეგიონს მოსკოვისთვის დამატებით სტრატეგიულ მნიშვნელობას ანიჭებს.

 

NATO-მ რუსეთის გაფრთხილებას უპასუხა და განაცხადა, რომ ალიანსი თავდაცვითი ორგანიზაციაა და მისი სამხედრო წვრთნები ან საქმიანობა რუსეთის ტერიტორიას საფრთხეს არ უქმნის.

 

NATO-ს გენერალურმა მდივანმა მარკ რუტემ მოსკოვის ბირთვულ მუქარას უპასუხისმგებლო უწოდა და განაცხადა, რომ ამ ეტაპზე NATO-ს ტერიტორიაზე რუსეთის მხრიდან გარდაუვალ საფრთხეს ვერ ხედავს.

 

კალინინგრადის საკითხი ბალტიის რეგიონში NATO-სა და რუსეთს შორის დაძაბულობის ერთ-ერთ ყველაზე მგრძნობიარე წერტილად რჩება.