„გენერალური მდივნის თანამდებობაზე ჩემი ყოფნის პერიოდში NATO-ს რელევანტურობა ეჭვქვეშ დააყენეს. ალიანსს უწოდებდნენ გაყოფილს, მოძველებულს და „ტვინით მკვდარს“. თუმცა რეალობა მდგომარეობს იმაში, რომ NATO არის ძლიერი, ერთიანი და როგორც არასდროს – მნიშვნელოვანი“, – ამის შესახებ NATO-ს გენერალურმა მდივანმა, იენს სტოლტენბერგმა გამოსამშვიდობებელი სიტყვით გამოსვლისას განაცხადა.

 

მისი თქმით, ბოლო ათი წლის განმავლობაში NATO გაძლიერდა როგორც ინსტიტუტი, მისი საერთო ბიუჯეტი გაორმაგდა. ასევე გაიზარდა ალიანსის წევრების რაოდენობა, უკრაინა კი NATO-სთან ისე ახლოს არის, როგორც არასდროს.

 

ამასთან, მან ევროპასა და ჩრდილოეთ ამერიკას შორის კავშირების მნიშვნელობაზე ილაპარაკა.

 

„ჩვენ ურთიერთდაკავშირებულ მსოფლიოში ვცხოვრობთ. უსაფრთხოების გამოწვევები ზედმეტად დიდია და კონკურენცია – ზედმეტად ხისტი, რომ ნებისმიერმა ქვეყანამ მარტო სვლა შეძლოს. ტრანსნაციონალურ ურთიერთობებში ინვესტირება წინსვლის ერთადერთი გზაა. ევროპელებს უნდა ესმოდეთ, რომ NATO-ს გარეშე ევროპაში უსაფრთხოება არ იქნება“, - განაცხადა მან.