ირაკლი ტორუა- იდიოტურ იდეებს შეწირული ახალი ბოროტი პერსონაჟი

 

„ვსტაწ, სუდ იდიოტ!“ ტორუამ სასამართლოს სიძულვილის ენაზე პროცესიდან მიმართა

 

ირაკლი ტორუა ერთკაციანი პარტიის, „გამარჯვება — ერთიანი საქართველოსთვის“, დამფუძნებელია. საზოგადოებას ის არც პროგრამით გაეცნო, არც იდეებით და არც საქმით. ის ლანძღვით და გინებით გაგვეცნო. ახლა ამავე ლანძღვის გამო სასამართლოში აღმოჩნდა.

 

საქმე იმ განცხადების საფუძველზე აღიძრა, რომელშიც აღნიშნული იყო, რომ ტორუა საჯაროდ, თავის Facebook-გვერდზე, მოქალაქეებს „ნახირს“, „იდიოტებსა“ და „ჩლუნგებს“ უწოდებდა.

 

სხდომის დარბაზიდან ტორუამ სელფი გამოაქვეყნა, ადვოკატ ზაზა ხატიაშვილის გვერდით. წარწერა ასეთი იყო: „ვსტაწ, სუდ იდიოტ!“

 

ფოტოზე, დარბაზში დამსწრეთა შორის, ჩანს ყოფილი ნოტარიუსი, რომელსაც თაღლითობის საქმეზე ბრალი აქვს წარდგენილი. საინტერესოა, რომ სიძულვილის ენაზე პროცესს ტორუა სწორედ ასეთ საზოგადოებაში ესწრება და ამ კადრს თავად აქვეყნებს.

 

წარწერა რუსული სასამართლო ფორმულის, „Встать, суд идёт!“-ის („ფეხზე ადექით, სასამართლო მოდის!“) პაროდიაა. 

 

ავტორი ალბათ ამტკიცებს, რომ ეს უბრალოდ სიტყვათა თამაშია. მაგრამ კონტექსტი თავისთავად მეტყველებს. ადამიანი სასამართლოში შეურაცხმყოფელი ენის გამო ზის და იმავე სასამართლოს სხდომის დარბაზიდან მიმართავს სიტყვით, რომელიც ზუსტად იმ ლექსიკონიდანაა, რომლის გამოც იქ აღმოჩნდა.

 

ეს შემთხვევითი ხუმრობა არ არის. ეს დემონსტრაციაა. ტორუა საზოგადოებას აჩვენებს, რომ არც მოსამართლე, არც პროცესი და არც კანონი მისთვის ავტორიტეტი არ არის. „იდიოტი“, რომელსაც აქამდე ოპონენტებსა და ამომრჩევლებს უწოდებდა, ახლა მართლმსაჯულებამდეც მივიდა.

 

ყურადღებას იპყრობს ის ფაქტიც, რომ პარტიის ლიდერი, რომელიც პატრიოტიზმზე ლაპარაკობს, ქართულ სასამართლოს რუსულ ენაზე დასცინის. ეს დეტალი ბევრ რამეს ამბობს.

 

 მოსამართლე ამ წარწერას შეაფასებს თუ არა, ჯერ უცნობია. ცხადი ერთია: პირველი სხდომის შემდეგ ირაკლი ტორუამ საქმე საკუთარი ხელით გაირთულა. ლანძღვით დაიწყო, ლანძღვით გააგრძელა და სიძულვილის ენაზე პროცესიც სიძულვილის ენის ახალ პლატფორმად აქცია.