რუსეთი ამზადებდა თავის საზღვაო ფლოტს ევროპაში სამიზნეებზე დარტყმისთვის რაკეტებით, რომლებსაც შეუძლიათ ნატოსთან შესაძლო კონფლიქტის შემთხვევაში ბირთვული ქობინი ატარონ, წერს Financial Times დასავლური წყაროების მიერ ჟურნალისტებისთვის ნაჩვენები საიდუმლო მასალებზე დაყრდნობით.

 

 „ფაილი, რომელიც შედგენილია 2008-2014 წლებში, შეიცავს სარაკეტო სამიზნეების ჩამონათვალს“, წერს FT. პოტენციური სამიზნეების რუქები წარმოდგენილია ოფიცრებისთვის მომზადებულ პრეზენტაციაში უკრაინაში რუსეთის სრულმასშტაბიანი შეჭრის დაწყებამდე.

 

 რუქებზე ნაჩვენებია 32 სამიზნე რუსეთის საზღვაო ძალებისთვის - ნატოს დანადგარები ევროპაში. ჟურნალისტები გვაწვდიან შემდეგ დეტალებს: „რუსეთის ბალტიის ფლოტის სამიზნეები ძირითადად ნორვეგიასა და გერმანიაშია, მათ შორის არის ბერგენის საზღვაო ბაზა, აგრეთვე სარადარო უბნები და სპეცდანიშნულების რაზმები“; „რუსეთის ჩრდილოეთ ფლოტის სამიზნეებია თავდაცვის ინდუსტრიის ობიექტები, როგორიცაა წყალქვეშა ნავების ბაზა ბაროუ-ინ-ფერნესში, ჩრდილო-დასავლეთ ინგლისში.

 

 პრეზენტაცია ასევე ასახავს, ​​თუ როგორ შეიძლება ამ სტრატეგიის გამოყენება შავ ზღვაში, კასპიის ზღვასა და წყნარ ოკეანეში, ნათქვამია სტატიაში. „ეს სცენარები მოიცავს ომებს ამჟამინდელ მოკავშირეებთან, როგორიცაა ჩინეთი, ირანი, აზერბაიჯანი და ჩრდილოეთ კორეა“, - წერენ ჟურნალისტები.