ქალაქ ბათუმში, სელიმ ხიმშიაშვილის ქუჩა N17-ში მოქმედებს ობიექტი, რომელიც, არსებული ინფორმაციის თანახმად, თავს უძრავი ქონების სააგენტოდ წარმოადგენს და შესაძლოა დაკავშირებული იყოს რუსეთის ფედერაციის მოქალაქე ანტონ ტიუნოვთან, მის ოჯახის წევრებთან და მათთან დაკავშირებულ პირებთან.

 

ჩვენს ხელთ არსებული ინფორმაციის საფუძველზე, არსებობს საფუძვლიანი ეჭვი, რომ აღნიშნულ მისამართზე მოქმედი პირები ან მათთან დაკავშირებული კომპანიები შესაძლოა ბათუმსა და თბილისში უძრავი ქონების სფეროში საქმიანობას იყენებდნენ საეჭვო ფინანსური ოპერაციების განსახორციელებლად. აღნიშნული გარემოებები საჭიროებს შესაბამისი სახელმწიფო უწყებების მხრიდან დაუყოვნებლივ სამართლებრივ შემოწმებას.

 

გავრცელებული ინფორმაციის თანახმად, აღნიშნულ ობიექტში შესაძლოა ასევე ფუნქციონირებდეს კრიპტოვალუტის გადახურდავების ან ფინანსური მომსახურების არაოფიციალური ცენტრი, რომელიც სხვადასხვა ოპერაციას, მათ შორის უცხო ქვეყნის მოქალაქეებისთვის, Telegram-ის არხების მეშვეობით ახორციელებს.

 

არსებული ინფორმაციით, აღნიშნულ სქემაში შესაძლოა ჩართული იყვნენ უცხო ქვეყნის მოქალაქეებიც, რომლებიც საქართველოს ტერიტორიაზე უკანონო საქმიანობიდან, მათ შორის ნარკოტიკული საშუალებების შესაძლო რეალიზაციიდან მიღებული თანხების კრიპტოვალუტაში გადაყვანის, შემდგომი გადახურდავების, განაღდებისა და ლეგალიზაციის პროცესში მონაწილეობდნენ. აღნიშნული გარემოებები, მათ შორის შესაბამისი პირების, კომპანიების, ფინანსური ოპერაციების, კრიპტო-ტრანზაქციებისა და შესაძლო შუამავლების როლი, საჭიროებს კომპეტენტური სახელმწიფო ორგანოების მხრიდან დაუყოვნებლივ, სრულყოფილ და ობიექტურ გამოძიებას.

 

ხაზგასმით აღვნიშნავთ, რომ ზემოაღნიშნული ინფორმაცია წარმოადგენს სამართალდამცავი ორგანოების მიერ შესასწავლ და გადასამოწმებელ გარემოებებს. უკანონო შემოსავლების ლეგალიზაცია, დანაშაულებრივი გზით მიღებული ქონების გადამალვა, კრიპტოვალუტის გამოყენებით საეჭვო ფინანსური ოპერაციების განხორციელება ან ფინანსურ სისტემაში უკანონო წარმომავლობის თანხების ინტეგრირება საქართველოს კანონმდებლობით იწვევს შესაბამის სამართლებრივ პასუხისმგებლობას.

 

ამასთან, არასამთავრობო ორგანიზაცია „საქართველო — კორუფციასთან ბრძოლის საინფორმაციო ცენტრი“ ფრთხილად მოუწოდებს საქართველოში და საქართველოს ფარგლებს გარეთ მოქმედ კომპანიებს, კერძო პირებსა და ორგანიზაციებს, სანამ აღნიშნული გარემოებები არ იქნება სათანადოდ შესწავლილი და სამართლებრივად შეფასებული, გამოიჩინონ განსაკუთრებული სიფრთხილე და თავი შეიკავონ აღნიშნულ პირებთან ან მათთან დაკავშირებულ კომპანიებთან ფინანსური, კომერციული ან უძრავი ქონების სფეროში თანამშრომლობისგან, რათა არ აღმოჩნდნენ შესაძლო უკანონო ფინანსურ სქემებში ჩართულნი.

 

არასამთავრობო ორგანიზაცია „საქართველო — კორუფციასთან ბრძოლის საინფორმაციო ცენტრი“ მიმართავს:

 

საქართველოს გენერალურ პროკურატურას,

საქართველოს ფინანსთა სამინისტროს საგამოძიებო სამსახურს,

საქართველოს შინაგან საქმეთა სამინისტროს,

საქართველოს სახელმწიფო უსაფრთხოების სამსახურს,

საქართველოს შემოსავლების სამსახურს

და სხვა შესაბამის სამართალდამცავ და საზედამხედველო უწყებებს,

 

დაუყოვნებლივ შეისწავლონ აღნიშნული ფაქტები, გადაამოწმონ მითითებული პირებისა და მათთან დაკავშირებული კომპანიების საქმიანობა, დაადგინონ ფინანსური ოპერაციების კანონიერება, შეამოწმონ შესაძლო კრიპტო-ტრანზაქციები, Telegram-ის არხებით განხორციელებული ფინანსური ოპერაციები, უძრავი ქონების გარიგებები და უცხო ქვეყნის მოქალაქეების შესაძლო მონაწილეობა აღნიშნულ პროცესებში.

 

დანაშაულის ნიშნების არსებობის შემთხვევაში, მოვითხოვთ, შესაბამისმა სახელმწიფო ორგანოებმა მოახდინონ კანონით გათვალისწინებული დაუყოვნებელი რეაგირება, მათ შორის დაიწყონ გამოძიება, უზრუნველყონ შესაძლო უკანონო ფინანსური სქემის შეჩერება და ყველა მონაწილე პირის სამართლებრივი პასუხისმგებლობის საკითხის შესწავლა.

 

ამასთან, გავრცელებული ინფორმაციის თანახმად, ანტონ ტიუნოვი შესაძლოა იძებნებოდეს რუსეთის ფედერაციაში და იმყოფებოდეს საქართველოს ტერიტორიაზე. აღნიშნული გარემოება საჭიროებს დამატებით საერთაშორისო სამართლებრივ, საიმიგრაციო და უსაფრთხოების შემოწმებას.

 

მოვუწოდებთ შესაბამის სახელმწიფო უწყებებს, უზრუნველყონ საქმის ობიექტური, გამჭვირვალე და დროული შესწავლა, საზოგადოებას მიაწოდონ კანონით დასაშვები ინფორმაცია და მიიღონ ყველა აუცილებელი ზომა საქართველოს სამართლებრივი, ფინანსური და საზოგადოებრივი უსაფრთხოების დასაცავად.

 

არასამთავრობო ორგანიზაცია

„საქართველო — კორუფციასთან ბრძოლის საინფორმაციო ცენტრი“