აზერბაიჯანის პარლამენტმა მილი მეჯლისმა ევროპარლამენტთან თანამშრომლობა შეაჩერა | აზერბაიჯანის მილი მეჯლისმა პარასკევს, 1 მაისს, კენჭი უყარა ევროპარლამენტთან ყველა სფეროში თანამშრომლობის შეჩერებას. ეს გადაწყვეტილება მოჰყვა დაძაბულობის ესკალაციას მას შემდეგ, რაც ბაქოელმა კანონმდებლებმა პალატა მუდმივ მიკერძოებულობაში დაადანაშაულეს. მიღებული გადაწყვეტილების მიზეზია მთიანი ყარაბაღის სომხური მოსახლეობის მხარდასაჭერად ევროპარლამენტის მიერ მიღებული რეზოლუცია. ევროპარლამენტის რეზოლუციის გამო პირველ მაისს აზერბაიჯანის საგარეო საქმეთა სამინისტროში საპროტესტო ნოტა გადასცეს ევროკავშირის ელჩსაც.

 

გადაწყვეტილება დღევანდელ პლენარულ სხდომაზე გამოცხადდა. მანამდე შეიქმნა სპეციალური საპარლამენტო კომისია, რომელსაც უნდა მოემზადებინა ოფიციალური პასუხი ევროპარლამენტის იმ ქმედებებზე, რომლებსაც ოფიციალურმა პირებმა აზერბაიჯანის მიმართ „მტრული საქმიანობა“ უწოდეს.

 

მიღებული გადაწყვეტილების თანახმად, მილი მეჯლისი ასევე დაიწყებს პროცედურებს „ევრონესტის“ საპარლამენტო ასამბლეაში წევრობის შესაწყვეტად.

 

 სპიკერმა საჰიბა გაფაროვამ კანონმდებლებს განუცხადა, რომ ევროპარლამენტთან ურთიერთობა წარსულშიც იყო შეჩერებული (მისი თქმით, მიკერძოებული დოკუმენტების გამო), სანამ ის 2016 წლის სექტემბერში არ აღდგა.

 

„სამწუხაროდ, გასულმა 10-მა წელმა აჩვენა, რომ ევროპარლამენტს არ აქვს განზრახული, ხელი აიღოს აზერბაიჯანის წინააღმდეგ მიმართულ მიკერძოებულ საქმიანობაზე“ | აღნიშნა მან.

 

 გაფაროვამ ასევე დასძინა, რომ აზერბაიჯანის მიერ ტერიტორიული მთლიანობის აღდგენამ პალატის მხრიდან კრიტიკა კიდევ უფრო გაამწვავა. კომისიის ხელმძღვანელად, რომელმაც გადაწყვეტილების პროექტი მოამზადა, ყოფილი ვიცე-სპიკერი ზიაფეთ ასკეროვი დაინიშნა.