საერთაშორისო პარტნიორების წყალობით, უკრაინა 2025 წლისთვის ფინანსებით უზრუნველყოფილია, - ამის შესახებ უკრაინის პრეზიდენტმა ვოლოდიმირ ზელენსკიმ ბრიუსელში ევროპის ქვეყნების ლიდერებთან, მთავრობის მეთაურებთან და სხვა წარმომადგენლებთან შეხვედრის შემდეგ განაცხადა, იუწყება სახელმწიფოს მეთაურის ვებგვერდი. 

 

ზელენსკიმ მადლობა გადაუხადა ყველა დამსწრეს რუსეთის აგრესიის წინააღმდეგ ბრძოლაში უკრაინის მუდმივი და ყოვლისმომცველი მხარდაჭერისთვის. ამასთან, შეხვედრის მთავარი თემა იყო უკრაინის გაძლიერება და მისი პოზიციების განმტკიცება როგორც ფრონტზე, ასევე დიპლომატიაში.

 

„ჩვენ ყველაფერს ვაკეთებთ იმისთვის, რომ უკრაინა ძლიერი იყოს, რომ არავინ არაფერი დაგვიწესოს და ვფიქრობ, ყველაფერი გამოგვივა“, - განაცხადა ზელენსკიმ.

 

შეხვედრაზე ასევე განიხილეს უკრაინის საჰაერო თავდაცვის გაძლიერება ქალაქებისა და კრიტიკული ინფრასტრუქტურის დასაცავად.

 

„სასაუბრო თემა ბევრია, ისინი მნიშვნელოვანია. არსებობს ძალიან მგრძნობიარე საკითხები - ზამთარი, ენერგეტიკა - რომლებიც უნდა დავიცვათ. ჩვენ ახლა სასწრაფოდ გვჭირდება 19 საჰაერო თავდაცვის სისტემა, რათა დავიცვათ სადისტრიბუციო სადგურები, რომლებსაც რუსეთის ფედერაცია ყოველდღიურად უტევს“, - აღნიშნა ზელენსკიმ.

 

შეხვედრაზე განსაკუთრებული ყურადღება დაეთმო საფრანგეთის მაგალითზე უკრაინული ბრიგადების დაკომპლექტებას და დანიის მაგალითზე უკრაინული იარაღის წარმოებაში ინვესტირებას. პრეზიდენტმა ყველა სხვა პარტნიორს ამ ინიციატივებში მონაწილეობისკენ მოუწოდა.

 

„უკრაინის ძლიერი პოზიციაა ჩვენი არმიისა და ეკონომიკის გაძლიერება. რაც შეეხება ეკონომიკას, ვფიქრობ, პარტნიორებმა მნიშვნელოვანი ნაბიჯები გადადგეს 50 მილიარდთან დაკავშირებით და ჩვენც მივიღეთ 20 მილიარდი აშშ-დან. მომავალი წლისთვის ფინანსურად უზრუნველყოფილები ვართ. მჯერა, რომ ეს ასევე აძლიერებს უკრაინას“, - აღნიშნა სახელმწიფოს მეთაურმა.

 

ამავდროულად, ზელენსკიმ მადლობა გადაუხადა იტალიასა და დიდ ბრიტანეთს შემდგომი მხარდაჭერის პაკეტებისთვის, რომელთა შესახებაც ქვეყნების ლიდერებმა, ჯორჯია მელონიმ და დევიდ ლემიმ, შეხვედრის დროს განაცხადეს.

 

უკრაინის პრეზიდენტის პრესსამსახურის ცნობით, ბრიუსელში გამართულ შეხვედრას ესწრებოდნენ: გერმანიის კანცლერი ოლაფ შოლცი, იტალიის პრემიერ-მინისტრი ჯორჯია მელონი, დანიის პრემიერ-მინისტრი მეტე ფრედერიქსენი, ნიდერლანდების პრემიერ-მინისტრი დიკ შოუფი, პოლონეთის პრეზიდენტი ანჯეი დუდა, ნატოს გენერალური მდივანი მარკ რუტე, ევროპული საბჭოს პრეზიდენტი ანტონიო კოსტა, ევროკომისიის პრეზიდენტი ურსულა ფონ დერ ლაიენი, დიდი ბრიტანეთის საგარეო საქმეთა მინისტრი დევიდ ლემი და საფრანგეთის საგარეო საქმეთა მინისტრი ჟან-ნოელ ბარო.