ერდოღანმა კომენტარი გააკეთა ისრაელის პრეზიდენტის ისააკ ჰერცოგის თვითმფრინავის ქვეყნის საჰაერო სივრცეში გავლის აკრძალვაზე აზერბაიჯანში COP-29 კლიმატის კონფერენციაში მონაწილეობის მისაღებად.

 

 „ჩვენ არ მივეცით მას ჩვენი საჰაერო სივრცის გამოყენების უფლება: არის სხვა მარშრუტები და ვარიანტები. ჩვენ ვუთხარით, რომ წასულიყო იქიდან. მაგრამ არც კი ვიცი წავიდა თუ არა. თურქეთი იძულებულია გამოავლინოს თავისი დამოკიდებულება გარკვეული საკითხების მიმართ და ჩვენ ამას გავაკეთებთ“. 

 - განაცხადა მან G20-ის სამიტზე გამართულ პრესკონფერენციაზე.

 

 მანამდე აზერბაიჯანული დიპლომატიური წყაროები აცხადებდნენ, რომ ისრაელის პრეზიდენტი ბაქოში COP29-ზე არ გაფრინდა იმის გამო, რომ თურქეთმა მას საჰაერო სივრცით სარგებლობა აუკრძალა.

 

 თავის მხრივ, ისრაელის მხარემ განაცხადა, რომ ჰერცოგის ვიზიტი აზერბაიჯანში „უსაფრთხოების მიზეზების გამო“ გაუქმდა, რის გამოც ბაქო განაწყენებული იყო.